Со настан насловен „Плати кафе со поезија“ денес Филолошкиот факултет заедно со Универзитетската библиотека „Гоце Делчев“ го одбележаа 21 март - Светскиот ден на поезијата.

Настанот се одржа во Универзитетскиот ресторан, каде што заедно со шолја кафе се рецитираше и пишуваше поезија од студенти, средношколци и заинтересирани млади.

- Целта ни е на едно место да ги собереме сите љубители на јазикот, на убавиот збор и да ги мотивираме што повеќе да творат и пишуваат. Без јазик мислата останува неистражена маглина во која сите ние се наоѓаме. Денес нашите студенти и нашите средношколци, односно нашата младина ќе се обиде да го каже некажаното со свои зборови - изјави деканката на Филолошкиот факултет проф. д-р Драгана Кузмановска.

Универзитетската библиотека „Гоце Делчев“, исто така, се јави како организатор на овој настан со цел да се одбележи Светскиот ден на поезијата.

- Се надеваме дека со ова ќе придонесеме за поголемо промовирање на поезијата во општествениот живот и афирмирање на ставот дека литературата е мост за сплотување, за обединување и градење на трајни вредности. Нашето задоволство е големо што имаме соработка со факултетот и студентите од УГД - изјави Соња Манева од Универзитетската библиотека „Гоце Делчев“ - Штип.

Настанот се одржа во Универзитетскиот ресторан, а беа присутни голем број студенти и средношколци кои дојдоа со подготвени парчиња поезија, а некои од нив твореа на настанот.